Circulares litterae dioecesanae anno 1895. ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae
XVIII.
135 nomina memoriae numquam periturae tradantur; digni sane, quos in tanta fide, religione, pietate, devotione ac fiducia imitemur ac sequamur ! Quod iam superest Venerabiles Fratres, incitati exemplis inhaerentesque vestigiis maiorum nostrorum, sedulam, in Dominicae vineae cultu laborantes, propagando augendoque Matris Dei Almae cultui, navate operam atque remissae tantisper, senescente vitiis saeculo, avitae devotioni in Eam ac religioni, in pristinum vigorem nitoremque restituendae ; ne unquam dissimiles aut plane degeneres eorum inveniamur filii, qui Augustam Virginem Patronam ac Magnam Dominam non adeo labiis, quam corde potius, filiali devotione ac fiducia repleto, culuerunt beatamque per saecula praedicaverunt. Hunc iam in finem, haud abs re erit saepius decursu proxime instantis mensis Octobris, Reginae ss. Rosarii sacro ac sollemni, verba pro re nata ad populum fidelem facere, eaque temporum necnon circumstantiarum adiunctis accomodata, ut omnes omnino, qui Catholico et Hungarico simul gloriantur nomine, in prisca erga Dei Gienitricem magis magisque firmentur pietate, maiori de die in diem accendantur amore, fiducia, cultu ac zelo erga magnam nostram Dominam ; siquidem teste s. Bernardo „ a saeculo non est auditum quemquam ad Eius currentem praesidia esse derelictum. “ Omnes igitur Venerabiles Fratres ac Filii Dilectissimi, quia non extranei, sed eodem mecum spiritu, fide ac religione, eadem insuper estis temporalium rerum sorte, patria communi ac sanguine coniuncti, omnes inquam concordibus votis confugiamus, mediante Beatissima ss. Rosarii Regina, ad thronum divinae Misericordiae ; uno ore ita attollentes una mecum supplices ad Coelum voces, ut nubes penetrare, ad divinae Maiestatis solium pervenire ac inde subventuram Ecclesiae Catholicae et praedilectae Patriae elicere valeamus clementiam et impetrare. Eia ergo Advocata nostra, coelorum Regina potentissima, illos tuos misericordes oculos ad nos converte ! Monstra Te esse Matrem! Monstra Te esse Magnam Hung arorum Dominam atque Patronam! His iam praehabitis, nexu subsequentis Beatissimi Patris Encyclicae d. d. 5 Sept. a. c. dispono, ut in omnibus huius adioec. ecclesiis, etiam regularium, ubi quotidie sacrum fieri solet, dato campanae signo, hora circa occasum solis congrua (vel alia, magis quae videbitur opportuna) a prima die mensis Octobris usque ad secundam Novembris inclusive, quinque saltem Rosarii decades, ad intentionem Beatissimi Patris et Matris Ecclesiae, religiose coram exposito SS. Sacramento recitentur, adiectis Litaniis Lauretanis (Encycl. d. d. 1. Sept. 1883.) necnon oratione : Ad te, b. Joseph, (Encycl. d. d. 15. aug. 1889.) praescripta. (Vide Cire, anni 1889. pag. 144.) Haec autem quotidie observari volo ac iubeo in omnibus indiscriminatim ecclesiis nominatis, etiam in talibus ubi hucusque ex abusu et negligentia intentioni Beatissimi Patris satisfactum non est. Minime obstantibus contrariis quibuscunque. Mandatum de recitando quotidie mense Octobri ss. Rosario.
