Circulares litterae dioecesanae anno 1895. ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae
XVII.
131 Sub •/• communico Vobiscum Instructionem de sic dicto matrimonio civili et matriculis parochialibus tractantem ; sub •//. ad fidelem populum directas, ideo vernacula lingua concinnatas, pastorales Litteras. Utrasque commune Episcoporum consilium exaravit. Quod ad Instructionem adtinet, ea Vos dirigat normaeque instar Vobis in Fidelibus dirigendis inserviat est necesse. Est quidem — ut mihi videtur — satis specificata, ad omnes, quos praesens rerum status provolvit, casus accommodata ; quoniam vero singulas difficultates in vita practica emersuras, singulas quaestiones ex usu nascituras Episcoporum Chorus nec praevidere, nec eis in antecessum solutionem et medelam parare poterat, Vestrum erit, casus e legis novae executione provenientes, si intricati fuerint, ad officium meum referre et meam inviationem adexpectare. Commendatur Vobis in eadem Instructione studium legum novarum civilium a. 1894. XXXI., XXXII., XXXIII., nec non ordinum ministerialium, earundem legum executionem respicientium. Merito quidem! Etenim, ut fidelibus consilio et directione adesse valeatis, Vos easdem leges et ordines nosse oportet. Has ergo leges et qui ad eas faciunt, ministeriales ordines prelo data et apud bibliopolas venalia, pro singulis parochiis in uno exemplari aere sacri peculii comparandi hisce Vobis facultatem tribuo. Ne vero iis, qui in hac Instructione enumerantur pastorales casus, quorundam audacia, aliorum protervia, aliorum autem levitas et indifferens in matrimonii sacramentum animus augeatur — eandem Instructionem nullo modo publici faciatis juris. Quod Litteras concernit Fidelibus inscriptas, has in quavis Ecclesia, in qua publicus Cultus divinus peragitur, die 29. Septembris cur. anni seu Dominica XVII-a post Pentecosten ex ambone sacro solemniter praelegetis, ut Fidelibus omnibus proprii et omnium Regni Episcoporum voluntas innotescat ; item ut Populi Fidelis Vobiscum, Vestra vero cum Episcopis et per hos cum Romano Pontifice unio et communio Angelis et hominibus fiant manifesta. Datum Strigonii, die 19. Septembris 1895. Claudius m. p. Cardinalis, AEppus. XVII. Nr. 4792. Instructio et Pastorales Litterae in re sic dicti matrimonii civilis dimittuntur. 24
