Circulares litterae dioecesanae anno 1892. ad clerum archi-dioecesis strigoniensis a Claudio Francisco Vaszary principe primate regni Hungariae et archi-episcopo dimissae

III.

15

scit? Aut ab eo quomodo aliis veniam postulat, qui utrum sit sibi placatus ignorat? Qua in re est adhuc aliud formidandum, ne qui placare iram posse creditur, hanc ipse ex proprio reatu mereatur. Cuncti enim liquido novimus, quod, cum is qui displicet ad intercedendum mittitur, irati animus ad deteriora provocatur.“1) — „Vae ministris infidelibus“ — exclamat sanctus Bernardus, — „qui necdum reconciliati, reconciliationis alienae negotia, quasi homines, qui iustitiam fecerint, apprehendunt! Vae filiis irae, qui se ministros gratiae profitentur! Vae filiis irae, qui pacificorum sibi usurpare gradus et nomina non verentur! Vae filiis irae, qui fideles sese mediatores pacis, ut peccata populi comedant, mentiuntur! Vae, qui ambulantes in carne Deo placere non possunt, et placare velle praesumunt!“2)

Vos quidem, Fratres mei dilectissimi, Dei auxilio adiuti statis ; id unum su- perest, ut qui stat, videat, ne cadat. Testimonium bonum, quod habetis, bonitatis vestrae augmento roboretur. „Qui iustus est, iustificetur adhuc; et qui sanctus est, sanctificetur adhuc.“ -— Exemplar enim splendidissimum viae sacerdotalis ante oculos positum habemus, ipsum summum et aeternum Sacerdotem, Jesum Christum Dominum nostrum. Ambulemus itaque, sicut ille ambulavit. „Quid est autem ambulare, sicut ille ambulavit, nisi contemnere omnia prospera, quae contempsit ; et non timere adversa, quae pertulit; docere, quae docuit; sperare, quae promisit; praestare beneficia etiam ingratis; non retribuere secundum merita malevolis ; orare pro inimicis; misereri perversis; invitare adversos; aequanimiter pati subdolos atque superbos; ac denique iuxta verbum Apostoli (Coloss. III. 3.) mori carni, ut soli Christo vivamus?“3)

Si officium sacerdotale, quod accepimus, hoc modo adimpleverimus, et divinum adiutorium et spiritualium dilectio filiorum procul dubio nobis aderit.4)

Per venturum autem iudicem iterum Vos rogo, Fratres dilectissimi, „ut me lassescentem sub onere vestris orationibus iuvetis, et oremus pro invicem, ut salvemur; quia dum nos vobis per orationis opem coniungimus, quasi ambulantes per lubricum vicissim nobis manus tenemus ; fitque ex magna provisione charitatis, ut eo robustius singulorum charitas perfigatur, quo in alterum alter innititur.“5)

Et ,,Deus pacis aptet Vos in omni bono, ut faciatis eius voluntatem, faciens in Vobis quod placeat coram se, per Jesum Christum, cui est gloria in saecula saeculorum. Arnen.“0)

S trigonii, die 4-a Februarii 1892.

‘) S. Gregor. M. Reg. Pastor, part. I. cap. 10. — 2) S. Bernardi, Sermo de conversione ad Clericos, cap. 19. — 3) S. Augustinus, in lib. sent. Prosperi, cap. 21. — 4) S. Gregor. M., epist. lib. II., epist. 10. — 5) Ibid., lib. 1. epist. 25. — «) Hebr. XIII. 20.