Circulares litterae dioecesanae anno 1881 ad clerum archi-dioecesis strigoniensis a Joanne Cardinale Simor principe primate regni Hungariae et archi-episcopo dimissae
VIII.
51 VIII. Ea genti nostrae est insita virtus, quam omnes annalium historiae nostrae paginae testantur, quod in omnibus, qui augustissimam regnantem familiam nostram contingunt, eventibus tam faustis, quam nefastis intimam capiamus partem, de illis gratulabundi laetemur, ob hos cum charis Capitibus nostris lugeamus, maereamusque. — Inter faustiores familiarum etiam regnantium eventus procul dubio matrimonia referuntur, per quae in altissimis imperantium familiis throni firmantur, fortuna regnorum stabilitur. — Hinc est, quod jam primum nuntium de delecta per Serenissimum Archi- Ducem et Coronae haeredem Rudolphum sponsa summo cum jubilo exceperimus. Communi laetitiae maxima profecto accedent incrementa, dum spem nostram die 10-a futuri mensis Maii eventu completum iri sciamus. — Hac nempe die stabunt ante Altare Dei Serenissimus Archi-Dux et Coronae Princeps Rudolphus et Serenissima Principissa Belgii Stephana, neptis magni illius Palatini Archi-Ducis Josephi, qui quinquaginta et quod excedit annorum intercapedine Proregis in Hungária dignitatem et grave munus sic sustinuit ac gessit, ut sibi in cordibus Hungarorum perenne gratitudinis monumentum erexerit, stabunt inquam, ut foedus connubii pangant, et gratiam, quae conjuges sanctificat, recipiant. — Aequum proinde justumve est, ut Serenissimis desponsis religiosa obsequia nostra deferre non intermittamus. — Quod fiet, si divitem in misericordia Deum instanter oraverimus, ut suae gratiae plenitudinem effundat in ipsos et in foedus, quod pangent; ut mutuo charita- tis vinculo semper conjuncti alter in alterius benevolentia conquiescant, sitque foedus hoc indesinens fons gaudii Augustissimorum Parentum, sed et pro ipsis Serenissimis Desponsis perennis scaturigo omnium benedictionum, quae felix connubium comitantur. Quamobrem praesentibus dispono, ut praeattacta die 10-a futuri mensis Maii ad hanc intentionem in Cathedrali, et Collegiatis, nec non Parochialibus Ecclesiis decantetur Missa cum Te Deum, eatenusque praevie locales magistratus et fideles ex ambone edoceantur. — Cum respectu nihilominus ad urgentiores rurales labores sacra haec devotio in parochiis ruralibus ad proximam Dominicam diem transferri poterit. Strigonii, die 25-a Aprilis, 1881. Nr. 2196. Ex incidenti connubii Serenissimorum Archi-Ducis Rudolpbi et Principissae Stephanae Missa cantanda cum „Te Deum.“ Paulus Vaczulik, Petrovillaeusis Parochus, susceptis moribundorum Sacramentis, die 22-a curr: obiit, aetatis 48, Sacerdotii 24. anno, cuius animam dum solitis ad aram suffragiis commendo, pro vacante, quam tenuit, parochia concursum usque 15-am Junii, h. a. duraturum publico. Strigonii, die 26-a Aprilis, 1881. Nr. 2197. Pro vacante parochia in Petrovilla concursus publicatur. i
