Circulares 1850-1864, Joannes bapt. Scitovszky de Nagykér, Archi-episcopus Strigoniensis, Regni Hungariae Primas

1857

Venerabili Clero Archi-Dioecesis Nostrae Strigoniensis

Salutem in Domino et paternam Benedictionem!

benevolus

Strigonii, typis Egydii Horak.

C ellensem Deiparae Virginis imaginem majorum etiam nostrorum maxima frequentia, sensibili devotione ac pia munificentia sacratam fuisse, annales loquuntur. Sacra pignora, quae ibidem hodie adhuc visuntur, sat superquc testantur tam Regum et Praesulum, quam nobilium et civium patriae nostrae erga magnam suam Dominam devotionem, pietatem ac fiduciam.

Septimum anno currente vertitur saeculum, ex quo ad gratiosam hanc imaginem omnis aetas, sexus et conditio miro nisu fertur, jam sanitatem in aegritudine, jam auxilium in tribulatione, jam consolationem in tristia, incrementum denique pietatis vel sauciatae conscientiae medelam quaerendo.

Si quando, nunc certe opportuna est occasio priscam in fidelibus nostris pietatem resuscitandi. Praeteriti temporis, ac nobilissimorum, quos aetas illa tulit, fructuum rememoratione pietatem erga Immaculatam DEI Genitricem majorem in modum inflammari non ignoro quidem; dubitari tamen non potest, saluberrimum hunc scopum longe facilius et securius obtineri, si vestigia majorum nostrorum ingredi, ac concordi pietate opem Virginis Matiis ibi implorare libuerit, ubi patres nostri tanto cum devotionis ardore adoraverunt et tam splendida religiositatis suae pignora reliquerunt.

Hinc firmum mihi est propositum, largiente Domino, ad Cellas Marianas peregrinandi, ac Festum Natae Virginis solenniter ibi celebrandi. Eo autem majus erit gaudium meum, quo plures e fidelibus meis mihi semet associaverint.

Vestrum itaque erit, Fratres et Filii Dilectissimi, hocce meum consilium ad notitiam creditorum vobis fidelium perferre, ac quibus per valetudinem et facultates id licet, ad piam hanc peregrinationem animare. Praeterquam quod unitis precibus facilius consequamur auxilium in tempore opportuno, mutuo etiam exemplo ad pietatem vehementius accendemur; dum autem considerabimus Sacra pignora,. quae tenera majorum nostrorum erga DEI Genitricem pietas Cellis Marianis obtulit, certe salubriter confundemur, excussoque, qui ab aliquo tempore animum occupat, tepore, ad aemulanda patrum nostrorum charismata majorem in modum inflammabimur. Ipse pagellae ecclesiasticae, quae plures jam hanc in rem divulgarunt articulos, abundantem vobis materiam praebebunt in institutione sacra pertractandam, quo sic pietatem in genere, erga Beatam Virginem Mariam vero in specie fidelibus vestris commendetis.

Quod ordinem et alia adjuncta piae hujus peregrinationis concernit, tardius plura vobis communicabo. Haec modo indigitasse sufficiat, quo sic desiderium meum sensim innotescat et plures ex fidelibus salutare capiant consilium festivam hanc fidei professionem una meum faciendi.

Amplectamur Mariae vestigia et devotissima supplicatione beatis illius pedibus provolvamur. Strigonii, die 25-a Martii 1857.