C. Tóth Norbert: Politikatörténeti források Bátori István első helytartóságához (1522-1523) (Magyar Országos Levéltár kiadványai, II. Forráskiadványok 50. Budapest, 2010)
Oklevelek, levelek
1 16 1522. július Stephanus de Bathor regni Hungarie palatinus et iudex Comanorum ac comes Themesiensis serenissimique principis et domini, domini Ludovici Dei gratia Hungarie et Bohemie etc. regis, domini nostri gratiosissimi in hac absentia sue maiestatis locumtenens etc. egregiis et nobilibus, universitati nobilium comitatus Warasdiensis salutem cum favore. Recordare potestis, qualiter vos ordinationi illi ac subsidii oblationi, quam in diéta sive conventione generali universorum dominorum prelatorum ac baronum et regni nobilium pro festo Beate Elizabeth proxime preterito1 Bude celebrata regia maiestas unacum eisdem dominis et nobilibus pro generali expeditione contra Thureas, Christiane religionis hostes perfidissimos concluserat atque confirmaverat, ad requisitionem oratoris2 per maiestatem suam vestri in medium missi in maiori parte consenseratis subsidiumque iuxta continentiam articulorum per vos superinde editorum obtuleratis, quos quidem articulos maiestas sua ad supplicationem vestram acceptans confirmavit, promittens in verbo suo regio, sicuti in hoc regno Hungarie eodem modo et in isto regno suo Sclavonie per quoscunque dominos ac nobiles observari facere. Nunc autem nonnullos inter vos esse intelligimus, qui premissa subterfugere et retractare niterentur in huiusmodi constitutionis vestre maiestatisque sue confirmationis derogamen manifestum, cum autem premissa ordinatio subsidiique oblatio pariter et administratio in hoc regno Hungarie generaliter observata et in effectum pro parte maiori deducta sit. Dominationes et amicitias vestras pro eo presentibus requirimus diligenter et nichilominus auctoritate prefati domini nostri regis, qua in hac absentia sue maiestatis fungimur, de voluntate eiusdem vobis sub pena infidelitatis ac amissionis cunctorum bonorum firmissime committimus et mandamus, quatinus acceptis presentibus prescriptum subsidium per vos benevole tunc, ut premissum est, oblatum iuxta continentiam articulorum vestrorum superinde modo premisso editorum et maiestatem suam confirmatorum omni occasione atque procrastinatione ulteriori semota reddere et exolvere ac quartam partem ipsius subsidii manibus prefati domini Benedicti de Bathyan, prout tunc ordinatum est, dare et administrari facere modis omnibus debeatis et teneamini. Quia regia maiestas nequaquam vult verbum suum regium, neque patitur ullo modo in ha[c] parte frustrari, nam si hiis maiestas sua non confidisset et per vos subsidium ipsum tempestive administratum fuisset, illa quoque castra finitima, que medio tempore amissa sunt, minime perissent, deinde universis dominis et regnicolis necessitate ipsa ita postulante viritim insurgere iniunximus et iam in procinctu itineris nostri sumus, ideo et vos estote parati, ut si opus fuerit, citissime coadunatis viribus utriusque regni p[... ]o salus patrie postulaverit, illo proficisci valeamus. Secus pena sub premissa facere non presumatis. Datum Bude, sabbato proximo post festum divisionis apostolorum, anno Domini millesimo quingentesimo vigesimo secundo.
