Kenyeres István - D. Szakács Anita - Mihály Ferenc: Magyaróvár Tanácsának Törvénykezési Jegyzőkönyvei az 1581-1582. években (Győr, 2012)
D. Szakács Anita: Rats- und Gerichtsprotokoll des Marktfleckens Ungarisch Altenburg 1581-1582
1582. augusztus 1. Augustus 112. (1.149.r.-151.v.) Toboy Benedictin stelt hiemit nachuolgendte zeugspersonnen, wider Saba Weillendtenn auf negsten beschaidt zur gegenweisung für welliche mit genuegsamen zuesprechen vnnd vermanungen, wie gerichts preuchig ausser Saba Georgls mit gethannen vnnd aufgehebten aydt, ire zeugen saag, wie volget erzelt, Saba Georgl burger vnnd des innern rats alhie, sagt bey seiner phlücht damit er geschworn, er sey damallen vor seinem hauß gesessen, da habe er denn Saba Weillendten von der gassen herüber also schreien hören, du Tobain leugst wie ein anngst huer, darüber inne die Tobain hinwider ein huer weibetenn hundts huern sonn, gescholt [en], wiß nit mer, sey beim anfang nit gewesen. Saba Michäl, Saba Georgls khnecht, zaigt ann, er habe denn Weillendtenn zur Tobain also reden hören, du leugst du vnachtsambe huer, darauf sy inne ein zaanschitterten hundts seel huern sonn gescholten vnnd verer gesagt seine weiber sein huern gewesen vnnd heit ein huern im hauß, so vili khünde er sagfen], Saba Marthan auch Saba Georgls, vnnd annderer khnecht sagt in simili wie vom negsten zeugen, Saba Michäln verstand [en], Vnder dessenn ist die Tobain, wider bemelt[en] Saba Weillenndten, wie das er sy in nagster clag, im rath widerumb vnnd öffentlich ein huern gescholten vnnd sy dahin zubringen erclärt, fürkhumen, vnnd soliches zubeweisen begert. Darauf Saba Weillendt sich, auf Nagdt Michaln, vnnd Naigdt Nicloschen, reueriert, vnnd anzaigt, dise beede vnnd noch ein Alfedi, habenß (des er wann sys nit bestenndig erweisen welle) ein huern gescholtenn deß sy bishero stillschweigendte vnnd vngeacht ligen lassenn. Darauf vnnd fürnemblichen, das sy inne sambt seinen weibern, vermüg seiner beschwerungen vnbillichen verleumbdet, vnnd geschmecht, habe er sy ja, vnnd doch am maisten biß sy das darbringe ein huern gescholtenn, dann es inne wie erachtlich billichen schmerzt, vnnd bit auf seiner zeugen saag was recht ist zuerkhennenn. Hierüber sein die vom Saba Weillendten angezaigtenn personnen vonn ambts wegen, wo deme also, vmb ir wissen befragt wordfen], Naigdt Michäl burger vnnd hanndlßmann alhie sagt er habe die Tobain ja verschiner zeit so mit ime greint vnnd ann seinen ehrn andasst ein huern gescholten, sey aber biß hero im fridt blib[en], Naigdt Niclosch ein hungerischer khnecht alhie zaigt ann, auf ein zeit habe inne die Tobain Sachen halber, die er zum thail nimer wisse, an seinen ehrn mit lesterwortten angriffen, vnnd mit schiegen zugemeßen, die habe er auch hinwider, vnnd ein huern gescholtenn, auch zuschlachen im willenn gehabt, aber er habe ir nichte gethann, vnnd sey also bishero verbliben. Dißmall gebenn richter vnnd rath beeden partheyen zum beschaidt, sy sollenn auf negsten rats tag wellichjer] sein wierdet, der funfzehnde diß, widerumben fürkhumen, vnnd verers abschiedts erwarttenn. Actum den 1. augusty anno [etc.] zwayvnndachzig [isten]. 138
