Kenyeres István - D. Szakács Anita - Mihály Ferenc: Magyaróvár Tanácsának Törvénykezési Jegyzőkönyvei az 1581-1582. években (Győr, 2012)
D. Szakács Anita: Rats- und Gerichtsprotokoll des Marktfleckens Ungarisch Altenburg 1581-1582
1582. július 23. 108. (I. 144.r.) Zwischen Saba Weillenndten vnnd Tobai Benedictin ist durch richter vnnd rath verlassen, beede thail sollen auf negsten rechtstag mit iren zeugen vnnd notturfften gefasster erscheinen. Actum denn dreivnndzwainzigisten july a[nno] [etc.] [15]82 ist[en]. 1582. július 30. 109. (1.144.r.-147.r.) Saba Weillendt stelt an heüt dato denn dreissigistenn july anno zwayvnndachzigistfen] wider Tobay Benedictin zur weißung seiner angebrachten beschwärungen nachbenante zeugen für, die sein alßdann nach vnnd mit genuegsamber vermanung des mannß aydts, auf des gegenthailß rechtlichenn begern, mit aufgehebten fingern, wie gerichts preuchig beaydigt, vnnd ire anzaigen wie hernach zuuernemen beschriben word[en], Miro Michäl, beim Lucaß Hugerl gspan alhie sagt wie das beschechen sey er beim hungerischen schuester gewesen, vnd alda vor Mißasch Matiaschfen] hauß spath abents fürübergangen, vnnd von adl reden hören, wie er nun haimbkhumen, vnnd das greinen vnnd geschrai laut wordenn habe sein herr gesagt, solle sehen was es sey. Da habe er von der Tobain gehört, das sy denn Saba Weillenndten, neben greillichen vnnd zured[en] abscheulichen Gotts lesterungen, einen zaan schitterten hueren treiberischen huern sonn, vnnd er sy hinwider ein huern gescholt[en] habe, merers wisse er nit. Moritz Caspar Müssarusch Mattiaschens burgers vnnd hanndlsmann alhie dienner zaigt ann, die Tobain sey von irem hauß, mit seiner frauen für seines herrn hauß ganngen, nidergesessen vnnd von allerlay dispudiert vnnd khriegt, da es ein weill geweert, sey Saba Weillenndt hinzue ganngenn, gefragt worumben sy also spat khriegen, vnnd wo sy iren grein hanndl nit beim tag austragen mügenn. Darauf die Tobai gesagt du vnerbarer huern sonn, was geth es dich ann, Weillendt geantworttet ret das nit, ich schlach dich inß gesicht, vnnd weckh ganngen, darüber die Tobain geschriern, gehe her ist dein muetter fromb vnnd schlach mich inß gesicht, Weillenndt gangen die hanndt aufgehebt vnnd schlagen wellen, aber sein frau gebetten vnnd abgewendet, sey mer gegen der khirchen weckhganngen, da habe die Tobain erst angefangen vnnd gescholt[en] du zaan schitterer hundts seel sonn, vnnd huer weibedter huern treiber, vnnd auf hungerisch Gott im himel übel vnnd vnwislichen geschmecht, so vili habe er gehört, vnnd von seines herrn fenster abzuegesehen. Naigdt Benedict Todt Mattiasch burger vnnd hanndlsmannß alhie khnecht, sagt in simili wie vom nesten zeugen Moriz Caspar verstanndfen]. Sehende Georgl Schoß Georgls, burger vnnd des innern rats alhie khnecht, sagt er sey auf seines herrn wagen gelegen, vnnd wie er schreien hören auf die gassen ganngen, da habe er so vili verstannden, das die Tobain mit hundts seel huern sonn, vnnd mit mer, das er nit alles bernemen khünen greillich[en] gefluecht habe. 136
