Novák Ádám (szerk.): Fontes Memoriae Hungariae IV. Varsóban őrzött magyar vonatkozású oklevelek, 1490–1521 (Debrecen, 2022)

Oklevélszövegek

202

tantum vigere debebimus, ut ipse Thurcus regnum ipsius fraternae maiestatis et dominia sua deserere et ad sua tutanda redire compellatur.

Item si contingeret contra terram seu waywodam Transalpinum Thurcum insurgere, et illud regnum aut ad officiolatus distribuere, vel penitus aliter quam nunc per se usurpare voluerit, extunc maiestas ipsa fraterna, si per nos requisita fuerit, praefato waywodae subvenire nobiscum una debebit, prout communi consilio melius videbitur. Quo quidem regno ab ipsis Thurcis eliberato, tenebitur postea ipse dominus rex Poloniae cum universo exercitu suo quam primum de illo exire, et redire, et regnum ipsum pacifice nobis et huic regno Hungariae relinquere.

Si vero hostis quicunque alius quam Thurcus, aut Tartarus regna nostra et partes sibi subiectas, vel eiusdem domini regis Poloniae, fratris nostri invaderet, pars per alteram in tali casu requisita, debebit alteri parti invasae modo praemisso omni favore, consilio, etsi regnum eiusdem protunc fuerit tranquillum, aliaque gravi necessitate eo tempore non premebitur, etiam omni possibili auxilio adesse, ut omnibus et praesertim hosti illi pateat et innotescat nos esse unum, et quod alter alterum deserere non intendit.

Item quod neuter nostrum regum inconsulto altero aliquam pacem vel concordiam cum Turcis facere debeat, sed simul illam habeamus, vel non habeamus.

Et nos qui cum illustrissimo domino Venetorum una pronunc treugas cum Thurcis habemus, quam primum expirabunt, pro novis ineundis et disponendis simulcum praefato fratre nostro serenissimo, medio oratorum nostrorum laborabimus.

Et si alter nostrum altero inscio Turcos provocaret, aut bellum illis indiceret ac inferret, in hoc casu alter alteri bella moventi succurrere non teneatur.

Item si aliquando contingeret qualicunque ex causa inter nos et subditos hincinde nostros, aut ratione metarum, damnorum vel aliarum quarumcunque rerum aliquam differentiam, vel dissensionem suboriri, per hoc pax ista perpetua inter nos et dominia nostra facta, non intelligatur violata, sed quam primum per utrumque nostrum regum eligantur more alias consueto ad loca consueta certi probi homines, qui huiusmodi differentias videant, et solum Deum prae oculis habens sub firmissimo juramento iustitiam inter partes faciant, quemadmodum antiquitus semper observatum, et adhuc tempore serenissimorum quondam Kazimiri Poloniae genitoris nostri charissimi ac Mathiae Hungariae regum felicis reminiscentiae ordinatio facta fuit, ita ut nulla unquam occasio infringendae huius pacis praestetur.

Item quod salva sint jura negociatorum in utroque regno antiquitus servata.

Item quemadmodum uterque nostrum et regna nostra invicem assistere consiliaque et auxilia contra hostes modo praemisso invicem praestare debeant, sic nullus nostrum regum in damnum, iacturam, molestiam, iniuriam vel pertur-