Novák Ádám (szerk.): Fontes Memoriae Hungariae IV. Varsóban őrzött magyar vonatkozású oklevelek, 1490–1521 (Debrecen, 2022)
Oklevélszövegek
192 Item quantum admodum subveniendi attinet, quomodo videlicet et quo pacto nobis in unum tempore necessitatis succurrere debeamus. Si Turci in aliquo numero mediocri puta in decem, vel duodecim milibus ad incursandum regnum Poloniae, vel aliquas terras vicinas praefati domini magni ducis Lithwaniae venirent, quia difficile foret ad unamquamque incursionem nos in tam remota terrarum distantia praeparare, seu movere, vel etiam gentes mittere et in tanto locorum et viarum intervallo eas fatigare, nam etiam si pervenire possent, inutiles essent ad pugnandum, nos antea debito tempore, hoc est ad minus per duos menses de hoc certitudinaliter avizati, quo citius poterimus et necessitas exposcet, debemus mittere gentes pro maiori posse nostro praefato serenissimo domino regi Poloniae et illustrissimo domino magno duci Lithwaniae in subsidium. Similiter ipse serenissimus dominus Poloniae rex unacum eodem domino magno duce Lithwaniae tempestive, hoc est ad minus per duos antea menses per nos avizatus, si Turci ad incursandum regnum nostrum Hungariae, aut Transsylvaniam et Moldaviam venirent, tenebuntur citius quo poterunt et necessitas exposcet pro maiori eorum posse mittere gentes in auxilium nostrum. Si vero aut imperator Thurcorum per se propria in persona veniret, aut etiam bassam aliquem cum potentia causa occupandi regnum Poloniae vel vicinas terras magni ducatus Lithwaniae mitteret, vel aliquod castrum finitimum obsideret, ita quod sub illo moraretur et pausaret, in hoc casu nos semota omni excusatione in persona nostra cum universo regno nostro Hungariae insurgemus, et praefatis domino Poloniae regi et magno duci Lithwaniae cum potentiis et viribus nostris in auxilium veniemus, aut prout suae fraternae maiestati et dominis consiliariis suis commodius et utilius videbitur interea temporis, dum videlicet Thurcus illic occupabitur, cum gentibus nostris alias partes dominii ipsius Thurci hostiliter aggrediemur, aut aliquem locum obsidebimus, et intantum urgebimus, ut ipse Thurcus regnum suae maiestatis fraternae deserere et ad sua tutanda redire compellatur. Similiter etiam, si imperator Thurcorum per se propria in persona veniret, aut etiam bassam aliquem cum potentia causa occupandi regnum nostrum Hungariae, vel Transsylvaniam, vel Moldaviam mitteret, vel Nandoralbam, aut aliquod castrum finitimum notabile obsideret, ita quod sub illo moraretur et pausaret, in hoc casu praefatus serenissimus dominus Poloniae rex et magnus dux Lithwaniae cum universo regno Poloniae, et universa ipsius illustrissimi domini magni ducis Lithwaniae potentia, semota omni excusatione insurgentes in auxilium nostrum venire debebunt, aut prout nobis et dominis consiliariis nostris commodius et utilius videbitur interea temporis, donec videlicet Turcus illic occupabitur, cum gentibus eorum alias partes domini ipsius Thurci hostiliter aggrediantur, aut aliquem locum obsideant, et intantum urgeant, ut ipse Turcus regnum nostrum et dominia nostra deserere et ad sua tutanda redire compellatur.
