Novák Ádám (szerk.): Fontes Memoriae Hungariae IV. Varsóban őrzött magyar vonatkozású oklevelek, 1490–1521 (Debrecen, 2022)
Oklevélszövegek
173 Item conclusum est, quod ex quo serenissimus dominus Wladislaus rex in praesentiarum ducatum Oppaviae, quem illustrissimus dominus Iohannes Corvinus, dux Sclavoniae et Lipthoviae etc. iure hereditario habet et possidet, eidem illustrissimo domino fratri suo dare commode nequit, eam ob rem interea, donec sua maiestas ab ipso domino Corvino duce, sive per viam concambii seu permutationis sive pro parata pecunia eliberare poterit, singulis annis in festo beati Iacobi apostoli tria millia florenorum eidem illustrissimo fratri suo dare, et vel in Glogovia, vel in Kozle deponi et assignari facere teneatur. Item quod interea, donec praefatus dux Albus in humanis aget, et maiestas domini regis Wladislai statum illius illustrissimo domino fratri suo reddere poterit, singulis annis tantam summam pecuniae, quantam ex illo toto statu, quem in praesentiarum idem dux Albus tenet, in pecunia parata habere potest, in loco et tempore, ut de ducatu Oppaviensi conclusum est, eidem illustrissimo domino fratri suo dare et solvere debeat et teneatur. Praeterea ordinatum et deffinitum est, quod idem serenissimus dominus rex Wladislaus ad praefatos status et ducatus ceteraque castra, civitates, oppida et fortalitia, etiam civitatem Carnoviam et castrum Czwylin adiiciat, et quia civitas ipsa et simul etiam castrum praetactum apud alienas manus fore perhibentur. Idcirco conclusum est, quod maiestas sua tam eadem duo loca, quam etiam ducatum Thosthek ac civitatem Bythom et castrum Zwerklenecz cum suis pertinentiis, ac alia universa, quae obligata sunt et sua maiestas pro illustrissimo fratre suo redimere dareque debet, infra spatium unius integri anni a data praesentium computando eliberare et redimere debeat et teneatur. Item similiter est conclusum, quod sua regia maiestas etiam ducatum Kozle, necnon civitates Hlopezycze et Wladislaw, simul cum universis vasallis, villis et pertinentiis, eidem illustrissimo domino fratri suo pro eiusdem contentatione dare debeat et quia apud manus alienas fore dicuntur. Conventum igitur et deffinitum est, ut haec tria loca, infra spatium trium mensium a data praesentium computando pro eodem illustrisimo fratre suo redimere et eliberare teneatur. Item quod si quando steura sive berna aliqua per Slesiam generaliter imponeretur aut urgente necessitate terrigenae insurgere et servitium aliquod iussu regiae maiestatis facere deberent, vasalli ceterique subditi eiusdem illustrssimi domini ducis se non retrahant, sed omnes debitum facere et pro rata sua et contribuere et servire etiam aliaque omnia instar ceterorum terrigenarum, prout scilicet tunc ordinatum fuerit, facere teneantur. Et ad hoc, dempta tamen persona eiusdem illustrissimi domini ducis, quae in hac parte excepta et privilegiata intelligatur, ex nunc obligati sint et habeantur. Item quod vasalli et ceteri huiusmodi subditi eiusdem illustrissimi domini ducis, praeter antiquam consuetudinem, iura et privilegia eorundem, extra provinciam nusquam in iudicium trahantur, sed ibidem prout scilicet hactenus observatum exstitit, in causis iudicentur, et ex parte etiam ipsorum iustitia
