Novák Ádám (szerk.): Fontes Memoriae Hungariae III. Varsóban őrzött magyar vonatkozású oklevelek, 1439–1489. Közreadja: Novák Ádám, Tóth Orsolya és Tóth Péter (Debrecen, 2019)
Oklevélszövegek - 149
149 Item, quod si qui rebelles huiusmodi compositionis fuerint et ipsas treugas observare noluerint ac eas violaverint, nichilominus treugae ipsae inter istos principes et eorum subditos obedientes et adherentes non intelligantur violate, sed transgressores ipsi per utramque partem puniantur, ad quod ipsi principes tenebuntur, nisi forte tales se iuri statuere vellent aut emendam facere se legittime obligarent, quo casu pars laesa contra tales iuris ordine procedat. Item, quod fiat proclamatio in omnibus tribus regnis, Hungariae scilicet Poloniae et Bohemiae et provinciis illis adherentibus et pertinentibus, ne qui hominum, cuiuscumque status et conditionis existant, causa nocendi et hostiliter ingrediantur ad alterum regnorum, Hungariae scilicet et Poloniae aut ad utrumque vel provincias illis subiectas, ex Bohemia, Slesia, Moravia vel Lusatia, quacumque ex causa vel sub quocumque quaesito colore, aut econtra ex regnis Hungariae et Poloniae ad regnum Bohemiae et provincias illi adherentes. Si qui vero huiusmodi prohibitionis contemptores extiterint, extunc et ipso facto intelligantur et sint hostes diffidati amborum regum et illustrissimi primogeniti et cuiuslibet illorum in solidum, et nichilominus contra tales invasores ipsi tres principes, videlicet serenissimi domini reges Hungariae et Poloniae ac etiam illustrissimus primogenitus ipsius domini regis Poloniae, bona fide contra eos quasi unus homo insurgere et se mutuo iuvare, tamquam eorum quilibet propriam rem ageret, debeant et teneantur; hoc adiecto, quod per hos tractatus et conclusiones istius treugae non receditur a tractatibus et conclusionibus inter regna Hungariae et Poloniae factis nec in aliquo illis praeiudicetur per praesentes, quin potius illa salva semper maneant atque firma. Quos quidem articulos super dicta treuga ac mutuo auxilio ipsorum amborum serenissimorum principum necnon serenissimi principis domini Kazimiri regis Poloniae etc., ita ut praemittitur per nos et praefatos regni Poloniae praelatos et barones confectos et conclusos, totamque dispositionem, promittimus, quod si ipse illustrissimus dominus Wladislaus primogenitus supradictus ac ipse dominus rex Poloniae quantum ad eum spectat acceptabunt, etiam serenissimus dominus noster dominus Mathias Hungariae Bohemiae etc. rex praefatus acceptabit approbabit ratificabit et in omnibus eorum punctis clausulis et capitulis observabit sine dolo et fraude, litterasque suas regales pendente suo sigillo munitas super approbatione acceptatione et ratificatione omnium praedictorum in oppido Radischa Olmucensis dioecesis in praetorio deponet seu deponi faciet super die octavo Pascae proximae venturae. In quorum omnium fidem et testimonium praesentes nostras litteras fieri et sigillorum nostrorum cum subimpressione muniri fecimus. Datum in Antiqua Villa, feria secunda proxima ante festum Cathedrae Beati Petri Apostoli, anno Domini millesimo quadringentesimo septuagesimo quarto.
