Novák Ádám (szerk.): Fontes Memoriae Hungariae II. Varsóban őrzött magyar vonatkozású oklevelek, 1388–1427. Közreadja: Novák Ádám és Tóth Péter (Debrecen, 2018)
Oklevélszövegek
86 Turcarum rabies saevissima, operi sanctissimo invidens, ac infesta, sentiens, ipsum regem a sui regni laboribus in remotis fidei catholicae peragentem negotia, in eiusdem fidei praegrave dispendium, se cum ingenti effroenataque potentia coacervans, christiani sanguinis more suo sitiens profluvios, terras praefati Romanorum regis etc. invadens hostiliter, quod non sine cordiali dolore referimus, quam plures magnificos virosque regni Hungariae nobiles, ceterosque in magna, ut fertur, multitudine in ore gladii prostratos, crudeliter interemit; timeturque non immerito ipsorum saevitia, ne ipsi, hac infelici animati victoria, plura audeant, possint et faciant, et usque, quod absit, ad penetralia regni et terrarum Hungariae, et ad irreparabilem iacturam et scandalum fidei catholicae, nisi in tempore, fortiter succursum fuerit, procedatur. Eatenus, princeps potentissime, ad vestrae praeceteris brachium virtutis in hoc horrendo casu sacra decrevit synodus singulariter recurrendum, obsecrans, et quantum poterit, per aspersionem sanguinis Jesu Christi vestram fidelitatem sinceriter deprecatur, quatenus quum sitis alumnus ac propagator fidei catholicae, intrepidus, ac inimicorum eiusdem fidei miles ac propugnator perstrenuus; attento demum, quum estis praelibato regi Romanorum, fratri vestro, modo multiplici inseparabiliter colligatus; et praesertim, quum et vestrae et praenominati illustris ducis Alexandri, fratris vestri etc. protectionis clypeo salus non modica et spes praefati regni Hungariae ultimata in hoc casu poene dependeat; velitis audacter pro fide contra subversores eiusdem, tanquam alter Judas Machabaeus, pro legibus paternis accinctus, potentissime consurgere, ferreque sine morae dispendio regi et regno saepe dictis salutis succursum, praedictorum hostium saevitiam dextera vestrae potentiae repellendo. Ne autem princeps inclyte, propria facta occasione controversiarum cum venerabilibus in Christo devotis, magistro et fratribus hospitalis Sanctae Mariae ?euthonicorum Jerosolymitanorum hinc inde pendentia, vos ac vestros a tam pio et summe necessario opere potentissimae caritatis retrahant quoquo modo; scripta nostra praefatis magistro et fratribus, uti in copiis, praesentibus inclusis, liquet, actu dirigimus, quatenus super omnibus praedictis controversiis, guerris et odiis quibuslibet, pacem simpliciter, si fieri poterit, alias treugas pacis, pro parte utraque firmatas et initas, inviolabiliter continuando, teneant et observent, seque ad succurrendum regno praedicto ac occurrendum hostibus celeriter ac potenter expediant, semotis obstaculis quibuscunque. Eatenus placeat velitque regia maiestas contemplatione fidei gentibus praedicti ordinis, illuc pro subsidio terras vestras pertransire volentibus, passus securos ac liberum transitum in eundo favorabiliter concedere, et largiri. Et nihilominus vestram celsitudinem, eadem ratione sacra synodus decentius ac in Domino quantum poterit, efficacius obsecrat praesentibus, et ad pacis ac concordiae pulchritudinem, si possibile fuerit, alias ad treugarum, ut praefertur, continuationem solidam ac stabilem, quantum in nobis fuerit, adhortatur. Ipsa enim sacra tantorum patrum
