Szent Benedek-rendi katolikus gimnázium, Esztergom, 1887

Salve, coruscans Pontificum caput, Fatis superstes gloria gentium, Custosque virtutis supernae, Salvificae fidei columna ! Salve, renascens martyrii decus, Qui busta Pétri sanguine collita Invictus illustras coronis, Martyrii totidem triumphis. Salve, supremum quem Dominus stitit Navis magistrum ! Caeca per aequora Aplustribus duc nos secundis Litora ad ulteriora vitae. Salve, angularis montibus in sacris Deposta rupes, praesidium piis, Compage cui conglutinati Nimbiferas fugiunt procellas. Navis, procellis nescia subrui, Rupes moveri nescia turbine, Quam grande praebes in dolosis Praesidium fidei periclis ! Salve, magister gentibus additus, Qui promit omnem vim sapientiae, Pacis sequester, qui implicatas Composuit sine caede lites. Salve, redempti Pastor amans gregis, Qui laeta nobis pascua porrigit, Tota die totaque nocte In speculis vigilat sacratis. Hereditatis pasce gregem tuae, Pastor regendum quem Tibi tradidit Aeternus et saevas luporum Insidias tua virga frangat.