VJESNIK 12. (ZAGREB, 1910.)

Strana - 218

218 als möglich ins werckh zurichten versprochen, darneben aber herrn Oratorn anzaigen lassen, das dieselb nit so schieinig geschehe, sein kein andere Vrsach, als das er gerne alle bestellung dermassen thun wollt, damit der herr Orator nit wie ein Currier dahin komme, sondern mit gebürender solemnitet, das khainem Legaten der vnnsern hieuor geschehen wehre, vnnd deszwegen herrn Oratorn vmb gedult gebeten. Der gefangenen halben wolle Er also bestellen lassen, das sy besser vnnd nit übler als zuuor gehalten werden sollen, vnnd so Er erführe, das solches nit geschehe, wollt Er iren hüetter den Khopf abhauen lassen. Hernach hat man *den herrn (fol. 43 b.) Oratorn vnnd Rimai ieden ein Türggischen Rockh oder Gaftan, also auch herrn Widtmayr, jungen herrn von Herberstein vnnd jungen Wolzogen, yedem ainen, etlichen andern Officier Dienern aber yeden etliche Ellen Grannadt verehrt vnnd ist also herr Orator in vorgemelter Ordnung wider zu seinen Schiffen geritten. Auf diesem abendt hat herr Orator bey dem Teftertar in einem Garten zu gast gessen, dahin Er auf sein begern zween Khöch, sein silber Credenz von Gieszbeckh, Khandl vnnd Pecher, auch Silber Täller, Tisch vnnd Penckh, vnnd sein Musica gelihen. Auf diszmal hat Er Teftertar dem herrn Oratorn drey Christen zu schenckhen zuegesagt, ist aber zu lest khaumb eine, als ein altt armb Weib daraus worden. Den 20. July ist der herr Orator zu den Franciscaner Mönichen zur Mesz gelahren. Diesen Tag sein drey Sibenbürger schlechte leuth zu Türggen worden vnnd zu dem Ali Passa in sein gezelt, welches Er nechst des herrn Oratorn Zeltt bey vnnsern Schiffen gehabt, gefürt worden, dern yeden Er ein vngrisch Par Stiffel geschenckht. Vnnder den Türggen aber ist grosse freudt gewesen, vnnd haben sich in die hundert vnnd mehr Pferdt zusamen gethan, mit den gemelten Renegaten in der Statt vmbgeritten, sich Irer gar viel mit Messern, Pfeilen, Federn, Copien durchstochen vnnd durch das Fleisch gesteckht, einer auch vornen bey der Prust ein lang Püerst Rohr, bis an das Schlossz, durch das fleisch gesteckht, also herumb geführt vnnd also steckhend loszgebrenndt. Den 21. dits hat der Ali Passa dem herrn Oratorn den vor verhaisenen (fol. 44 a.) Trommetter, ainen Lottringer Nicola Rosza genandt, so zu Stain am Anger vnder dem Obristen Rudolphi gefangen worden, vnnd noch ainen Vngern, herrn Mieshasi Vnderthan, geschikt. Descriptio Ciuitatis Albae Graecae. Die Statt Griechischweissenburg ligt zu endt des Hungern Landt, ist ein rechter Schlüssel desselben, an einem bequemben orth, da der grosse Flusz Sauus oder Saw (welcher in Crain entspringt vnnd durch