VJESNIK 11. (ZAGREB, 1909.)

Strana - 103

Jem ljuč vdovicam i siroticam je brala, Još ta krivica bila je mala. Nego cara Leopolda htela mentuvat orsaga, Ar je "štimala, da ni v peklu vraga. Vnoge sirote je rascvilila I vnogoj gospodi veliku krivicu včinila. Kraljstvo hotela pod se potkopati I svoje oholnosti perje pokazati, Imala je grade i imanja vnoga, Koja grabeć, rasrdila je boga, Jošće je želila imat orsage I svoje pohlepnosti pokazati trage. Ali bog pravični ljubitelj pravice Ni hotel vu gizdosti dugo trpet te ptice. Vendar dugo nje strašne sramote Ne bil moguć trpeti, nadalje nje špote, Nego je nju kaštigal poleg vse vrednosti Tak da do nje smrti bude ji zadosti. Vnogi gavaliri po nje zlu tolnaču Za svojem imanjem navek jàko plaču, Ne lestor za blagom nego i za glavom. To su si dobili, baratajuć z vragom. Anda sad pričinjam nje tolnač pisati, Dok ga ne spišem, ne ću s perom stati : Jezero šest sto šezdeset i deveto, Po nje kćere svadbe bude s tima peto, Išla je Rakociu vu zemlju erdelsku, Poslušajte sada vražju pamet žensku. Počela je taki zeta obraćati, Njemu govoreć kako prava mati, Ze vsemi Erdelci da k Turkom priloži, Da s njimi kot z voli v jarmu se vozi. Kaj ni vrag mogel skovati, To je žena Erdelcem v glavu mogla dati. Spuntala Erdelce proti cesaru, Da su vsi privrgli k turskom caru, Nje obraćajuća jedno leto celo Vsu šegavost vrgla je na pesje delo.